باجوڑ[مشرقی نامہ]تحصیل خار کے علاقے صادق آباد میں ریموٹ کنٹرول دھماکے کے نتیجے میں اسسٹنٹ کمشنر نوائے گائی فیصل اسماعیل، تحصیلدار عبدالوکیل، پولیس سب انسپکٹر نور حکیم، کانسٹیبل رشید اور ایک شہری شہید ہو گئے، جبکہ 11 افراد زخمی ہوئے۔ سیکیورٹی حکام کے مطابق یہ حملہ اس وقت ہوا جب اسسٹنٹ کمشنر کی سرکاری گاڑی معمول کی ڈیوٹی پر جا رہی تھی۔ ابتدائی تحقیقات سے معلوم ہوا ہے کہ حملے کا ہدف سرکاری افسران تھے اور اس میں کالعدم تحریک طالبان پاکستان (TTP) کے ملوث ہونے کا شبہ ہے۔ واقعے کے بعد علاقے کو گھیرے میں لے کر سرچ آپریشن شروع کر دیا گیا ہے جبکہ بم ڈسپوزل اسکواڈ اور اسپیشل برانچ کی ٹیمیں جائے وقوعہ سے شواہد جمع کر رہی ہیں۔ زخمیوں کو فوری طور پر قریبی اسپتالوں میں منتقل کیا گیا، جہاں تمام اسپتالوں میں ایمرجنسی نافذ کر دی گئی ہے۔ وزیر اعظم شہباز شریف، صدر آصف زرداری، بلاول بھٹو زرداری، وزیر اعلیٰ خیبرپختونخوا علی امین گنڈاپور اور دیگر سیاسی و عسکری قیادت نے واقعے کی شدید مذمت کرتے ہوئے متاثرہ خاندانوں سے اظہار تعزیت کیا۔ شہداء کی نمازِ جنازہ پولیس لائن باجوڑ میں ادا کی گئی جس میں اعلیٰ افسران، قبائلی عمائدین اور شہریوں نے بڑی تعداد میں شرکت کی۔ بلاول بھٹو نے اپنے بیان میں عالمی برادری سے اپیل کی کہ وہ دہشتگردی کے خلاف پاکستان کے ساتھ کھڑی ہو، کیونکہ پاکستان اب تک دہشتگردی کے خلاف جنگ میں 92,000 جانوں کی قربانی دے چکا ہے۔
